حْلامة خير وسْلام

13

العرائش نيوز:

حْلامة خير وسْلام 

نعست بكري حسيت براسي عييت ، وحلمت باللي مشيت نتسوق بالسوق الجديد ديال الخضرا ولقيت المضاربة والغوات والفلوس مشعترة وواحد كيحرك يدو بزاف كيهز شي وراق زورق طايحين وناس كتقول الله هذا منكر، وشي كيقول خصني حتى انا ومال لاخور ماشي عرايشي و خذا هنا وواحد الراجل كبير كيقول ليهم كلنا مغاربة حتى اللي ف طنجة او تطوان أو عين الشوك أو حتى الميركان من حقو ياخذ .

وواحد السيدة كتغوت حر جهدها واش انا ماشي مغربية ؟ واش انا يهودية ؟ علاش واحد ف الميريكان وكيتخلص مزيان حسن مني ؟ علاش الميركان تابعة لإقليم العرائش ؟ وانا بقيت مشلوط محيلتي نمشي نشوف الفريز والمانجة محيلتي نجلس نتفرج وخصوصا رمضان مكينش ما يدار ، كولشي مرمضن وكولشي كاعي ولقيت واحد جالس وكيحسب غير بوحدو انا في الاول سحابلي احمق حيث مكيقول والو غير 70 و71 – وكيعاودها بزااف 70 و71 وكيمشي وكيجي وكيقول 70 واك واك أعباد الله71 وعباد الله والمسؤولين والبشر 70 و71 بقا فيا مسكين وبقيت كنقولو وا الشريف الرجوع لله العواشر هاد سير توضا وصلي شي ركعة ودعي ربي يرزقك الصحة والهنا والمال الوفير ، شاف فيا وقالي سير بحالك بعد مني راني منصالحش ليك انا راه شفت بعيني مليون و3000 درهم طايحة في السوق وغير تلفت ودرت نشوف لمن طاحت لقيتها مشات هزها الريح .

ايوا قلت ليه راه ممكتباش ليك وراه ديال ناس وربما غير تهيأ لك أنك شفت الفلوس طايحة ، شاف فيا عاوتاني وقالي وسير بعد مني خليني عليك راه منصلحش ليك وقالي را كل نهار كنشوف الفلوس مشعترة هنا وغير كندور نشوف شنو واقع كنلقها بااااااااح طارت.

عز عليا مسكين وبقيت كنقول سبحان الله السوق زوين ولكن درايم والافلام اللي فيه عكس ذلك ومشيت بحالي وانا كنقول حسبي الله ونعم الوكيل واش هذ البلاد مغدياش تقاد واش واش ووواش كنقولها وانا معصب ومن عادتي ملي كنتعصب كنضرب اي حاجة في طريقي برجلي وانا نهزها ونضرب واحد القفة في الاول بانت ليا خاوية ولكن مللي ضربتها رجلي تناملات كانت عامرة بريكات زورق . من تماك وانا فايق وكنكمد ف رجلي بالماء سخون حيث مع الضربة مع الفيقة لقيت رجلي كلو دمايات والكاطري ديال الصالة فيه الدم وانا بحال قبان الدمدومة متبع الحلم اللي ف السوق وضربت رجلي ودبا انا كنتسنا نشد طاكسي باش نمشي للسبيطار مبغيتش نركب في تربيبوتور حيث مفيهش لاسورانس .

لهلا يخطيكم عليا تبعتوني وهزيتو هبالي وقريتو معايا الحلم ديالي وخا شوية غامض ولكن المهم كنحلم ولكن ردوا البال دبا ضربو رجليكم مع الكاطري .

توقيع محمد بلمهيدي :  مول الحلامة بالدارجة المغربية

 

 

اترك رد

لن يتم نشر عنوان بريدك الإلكتروني.