العرائش نيوز:
احنا معاك يا العثماني
سعد السعود حنيو بالحناني
عهد الزرود الورود فالقناني
جا الموعود البطل العثماني
الفراجة و الفرج ها هو جا
كلشي صفق جا الباني الخير غيتهرق فالركاني
والنوم يرجع لجفاني حليلي على الجو تفاجا
قالو السيد معقول حقاني
قالو غانعاونوك كون هاني
قاللو مرحبابيك في جناني
توكل على الله قضي حاجا
الله يسترك لغلا شواني
الله يحفظك الضو عماني
خمسة دالعاطلين فحضاني
و البترول منوض لعجاجا
نتائج التعليم مخوفاني
مديونية دولية تابعاني
قطاع الصحة ما شفاني
الفقر الهشاشة والحاجا
تقدر تحارب الريع اللي كلاني
تقدر تحارب الفساد عاوتاني
التمساح العفريت القحطاني
و بوعو بنت الغول غونجا
عنداك تكون سور حاني
و تقول عفا الله ثاني
وتنكث في القبة للبرلماني
وتنوض عليك العجاجا
تبث و نبت و كون غاني
حنا منك خاطرنا هاني
لاتخلينيش نعض لساني
وتكون فلوس تابع دجاجا
عندك أسبوعين بالتواني
للتشكيل وتلميع اللواني
فرز بين القريب و البراني
كلهم متشابهين في البرماجا
حكومة بعشرين كافياني
قنت شي وحدين فالركاني
ونقي الوسخ و العفاني
دير لهاد المغرب شي حاجا
ركز على الوطن اللولاني
وميك على الحزب الفلاني
وتوكل على الله بيه عاني
واحنا معاك يا العثماني
المزوري عبد اللطيف مارس 2017
