غريب في بلادي من هدي شحال

العرائش نيوز:

غريب في بلادي من هدي شحال

غريب في بلادي من هدي شحال
باش ترجع كيف كانت من المحال
في كل مرة نوضع نفس السؤال
 فين مشاو رجالها و فين الأشبال

غريب يا سيادي ولليت خيال
قليل منهم عليا يعقال
شديت واحد جاوبني و قال
 هاجروا جلهم ما عجبهم حال

وبقيت هنا في جميع الاحوال
يتيم محجور مجبد لحبال
نتبرم و ندور وحدي جوال
مبرد على قلبي  لتقال

عوال يا علال نعاشر لردال
عوال يا بلال ننضم لقوال
البطاطا غلالة و الكبال
في قلب الساحة  يتكال

فين النافورة و الجمال
الورد في الجرادي دبال
سميتك مدينة الازبال
المجموعة فوق  لبغال

كرطوا منك لرمال
الحوت هاجر و مال
الدودة و التوت رحال
لشيين اللوكوس  زال

بوخنو و السفرجال
العشلوش و جميخ لخبال
في السوق كلشي يتكال
 واش باقي فيكم اللي يعقال

كانت الحلقة وكان الطبال
كان أبا بونة و الدلال
كانت البسمة في وجه لعيال
 كيلو د البيصار كان بريال

كيتقال وللات كيتگال
شي جا من ازيلال
شي من بني ملال
 في العرايش حصال

سكنو البرارك وطال
مقامهم كانوا على بال
منهم رجال الأعمال
 ومنهم تاجر وصال

وأنا و انت خيط فصال
القاع على الحجر مبجل
العين في البحرو الهلال
 والودن عالخبرو الهوال

يا لعرايشي كون على بال
فيك دعوى باش تزول محال
غيجردوك القمجة و السروال
اماالمستقبل محال  محال


 


 


شاهد أيضا
تعليقات
اترك رد

لن يتم نشر عنوان بريدك الإلكتروني.