العرائش نيوز:
ضباع متسني جيفت الحمار
مبروك مسعود يا النفيسة العرايشية
على الزيادة بست تويمات صغار
تعدبتي مسكينة بولادة قيصرية
بعد الوحام و المخاض ولدت فار
ستة رفضو الشمتة و العبودية
هازوا علامهم ضد الاشرار
الاشرفي بالعود والزيتوني في البلدية
مارصوهلال والشاوي ستة من الخيار
قالو اللا للوزيعة و الشلاهبية
قالوا اللا للحكرة و العبودية
قالو دبرتو على الشلافطية
لمخيار في الكركاع تقاسموه لكبار
خاص العجنة تتعاود بالديموقراطية
والمسؤوليات يتحملها الايطار
والتحرير من التبعية و العبودية
بدون درهم يصوت المستشار
المهندس كان مسكين خدام بالنية
مول الصباغة خدى فيه الثار
الكاتب العام طلعوه للمصرية
والكاتب الخاص يقابل العقار
خاصنا زوج نيابات أولوية
مامتنازلينش عليها أو العار
خاص العمل بالصفا و النية
و المشاركة في اتخاذ القرار
قالوا فين المحطة الطرقية
ملفات كثيرة يشوبها الغبار
قالوا حديقة العوينة المنسية
قالو شللا ما يتقال على البكار
قالوا المرا كلات صطلة دالهندية
قالوا أطاع الله وصل للمليار
قالوا ملف ثالث غيتحكم شي شوية
قالوا هادي نتيجة الاستهثار
الرئيس اويلي واش هد الشي بالنية
والنايب تهرق فوقو المجمار
قالو التراضي كان بين آل القرقرية
و بين كبير راس الاحرار
خود الرآسة كلس في البلدية
و سير ضربها بنعسة في الدار
خللي وليدي يتمعاش شي شوية
ويجمع ميسة و ضامة في اللخار
الشيخ سافر و خللى لوصية
والدراري دخل بينهم المنشار
بشهادة العدول قصة حقيقية
الكامبو دالبرامل عندو الخبار
نسيت موقف العدالة و التنمية
ضباع متسني جيفت الحمار
شوف شوقاع لك يا العرايشية
هاد الشي زاد على حدو و كثار
وفي كل مرة نفس المسرحية
كتختلف غير في توزيع الأدوار
المزوري عبد اللطيف
شتنبر 2017
