عبدْ الإلهْ السمّاع: حارسُ الماءْ (نصّ مسْرحي)

العرائش نيوز:

عبدْ الإلهْ السمّاع: حارسُ الماءْ (نصّ مسْرحي) 

حارسُ الماءْ

عبد الإله السماع

المكــــــــــــــان: بئر

الزمــــــــــــــان: زمن الخوصصة

الشخصيــــــات:

• حارس الماء
• خذ الورد (عاشقة حارس الماء )
• سيد الحقول
• سيد الطاحونة
• سيد الحراس
• زوجة سيد الحقول
• زوجة سيد الطاحونة
• زوجة سيد الحراس

الإنارة الأولى:

يخرج حارس الماء من البئر وهو مبلل وملطخ بالطين والتراب، يبدأ بربط الدلو ثم يضعه بالقرب من جدار البئر.

تقترب من البئر كل من زوجة سيد الحقول وزوجة سيد الطاحونة تضعان بالقرب من جدار البئر جرارهما.

يتناول حارس الماء الدلو ويبدأ بملء الجرتين.

تظهر خذ الورد وتبقى بعيدة عن البئر وهي تحمل في يدها جرتها. تتابع خذ الورد حارس الماء وهو منهمك في السقاية. خذ الورد جمالها بسيط وفتنتها متخفية وراء خجلها.

تبدأ كل من زوجة سيد الحقول وزوجة سيد الطاحونة بالتحرش بحارس الماء من خلال لمس عضلات ذراعيه العاريتين. ينهرهما بنظرة شرسة وصارمة.

تظهر زوجة سيد الحراس، تقترب من حارس الماء وتبدأ بمسح العرق عن جبينه لإثارته. يتخلص منها ويتجه نحو خذ الورد ويأخذ جرتها ويرجع إلى البئر.

وهو يحاول تناول الدلو تمسك زوجة سيد الحراس يد حارس الماء.

زوجة سيد الحراس : (تكلم حارس الماء بحركة فيها الكثير من الدلال والإثارة)

خليتيني أنا لي قريبة منك ومشيتي بعيد، واش ما عجبكشي السطل ديالي.

حارس المـــــــــاء :

 كلها وناوبتو، أنا ما بغيشي الما يطيرلو ويرجع مخروض.

(يهملها ونظرات الأخريات تكاد تنهشه

يملأ جرة خذ الورد ويحملها ويذهب بها إليها.

يضع الجرة بقربها وهي شاردة فيه، تنظر إليه بوله وحنان. يقول لها حارس الماء.)

حارس الماء :

 إذا بقيتي واقفا هنا عيذبل غرسك وتضيع طراوة الماء ويحزن قلبك.

(تتناول خذ الورد جرتها وتنسحب)

يرجع حارس الماء إلى البئر ويبدأ بملء جرة زوجة سيد الحراس. تبدأ النساء الثلاثة الطواف به ورشه بالماء.

حارس المـــــــــاء :

الما ماشي دلعب وهذ القطرات لي كضيعو يمكن تحيي نبتة ويمكن يرويو عطشان. واللعب مع عزري فحالي ماشي فحال اللعب مع الدراري.

(ينخرطن جميعهن في الضحك بدلال)

زوجة سيد الطاحونة:

زينك وقوتك تفتن كل مرا خصوصا إذا كانوا كيقطروا بالزين فحالنا. كيفاش كتقدر تلجم راسك وهذ الغزلان كاملين كيدورو بك.

زوجة سيد الحراس :

 كيطفي النار لي كيدا فيه بالما.

    (يبدأن بالضحك)

زوجة سيد الحقول :

مين كيكب عليه لما كيحس بالحنان فحال الحنان ديال مرا. لكن خسارا هو كيعشق الما. أجي الحبيب ديالي نحضنك وعتلقاني أحن من الما.

(ينخرطن في الضحك)

حارس المــــــــــاء:

لو ما كنت كنعشق الما كن ضاع هذا البير وضاعوا حتى الناس معه

– ظلام –

الإنارة الثانية:

حارس الماء ممدد قرب البئر. تظهر زوجة سيد الحقول وفي يدها سلة فاكهة.

 تقرفص بالقرب من حارس الماء.

حارس المـــــــــاء :

شكون نتي ؟ و شنو باغا؟ هذي ماشي الساعة ديال السقا.

زوجة سيد الحقول :

جيت باش تسقيني أنا. أنا لي عطشانا وجيتك بهدية. خذ (تمد له سلة الفاكهة) نقيتو بيدي من الجنان ديالي وحدا وحدا.

(تتخلص من غطاء رأسها)

حارس المـــــــــاء :

 بعاد مني، عندك رجلك هو أحق بثمار جنانو.

زوجة سيد الحقول :

أنا مفتونا بك وما جنيشي النعاس وجيت لعندك وجايبا معيا الدفى دفراشي والحنان د لانثى.

حارس المـــــــــاء :

أنا للا قانع بالدفى ديال الحيط د هذ البير وكافيني الحنان ديال ماه، وانت باغا تجرجرني للخيانة، وإذا خنت ضاعت نقاوتي وصفايا وسهل عليا ذاك الساعة نخون هذ البير  ونفرط في ماه.

زوجة سيد الحقول :

وهذيك الزيزونا لي كتجي للبير وتبقى واقفا فحال شي عكاز مغروس بلا ما تقرب للبير وتمشي انت وتعمرا السطل ديالا. هذيك واخا تخون الما معها. وعاد مسميا راسا خذ الورد هذاك خذ الخبيزة.

حارس المـــــــــاء :

هذيك روح جميلة كنحس بها قريبا مني لكن ما تقدرشي لمسها. والنهار لي يوقع شي حاجةبينتنا كل شي عيعرف. زيدون هديك عازبا وأنا عزري.

زوجة سيد الحقول:

أنت مجنون عتحول العشق ديالي ليلك لكراهية. لأنك حتحطم كبرياء مرا منحت نفسها ليلك.

(تنسحب زوجة سيد الحقول وهي غاضبة)

تظهر زوجة سيد الطاحونة. تقترب  من حارس الماء الذي يستعد للنوم.

 فطن بها فينتفض ويظل جالسا مسندا ظهره لجدار البئر.

حارس المـــــــــاء :

شنو باغا عاوتني، أنا مهلوك، وخصني نرتاح من تمارا.

زوجة سيد الطاحونة :

 جيتك بقميص من الحرير (تتناوله وتعرضه أمامه)

خيطتو بهاد الصبيعات لي كيبداو يقفقفو مين كان كون حداك إذا لبستي هذ القميص عيكون عليك أحن من الما.

حارس المـــــــــاء :

حتى حاجة ما أحن من الماء.

زوجة سيد الطاحونة:

وهذ الجسم (تقوم باستعراض قوامها)

هذ البياض الصافي ماشي أحن من الما

حارس المـــــــــاء :

هذاك الصفا ديال جسمك كيخصك بوحدك، أما الصفا ديال الـما كيخص الناس كاملين وأنا مسؤول عليه.

إذا لمست جسمك يغضب الما ويفقد الصفا ديالو والما ما كيبقلشي لي يدو موسخا يكون حارس عليه.

زوجة سيد الطاحونة :

شحال تعذبت باش نغزلك الحرير وخيطتلك هذا القميص وأنت كدلني. شحال صعيب الذل على مرا كتعرض راسا على راجل وخصوصا مرا جميلة فحال عود الرمان.

حارس المـــــــــاء :

أنا ما عنطلبشي منك السماحة إذا حستي بالدل أنا عاهدت نفسي باش نحافض على الصفا فحال الصفا ديال الما دلبير

(تنسحب زوجة سيد الطاحونة وهي غاضبة)

يستعد حارس الماء للتمدد مرة أخرى، يتفاجأ بظهور زوجة سيد الحراس،

 تنحني بقربه.

زوجة سيد الحراس :

الليلا غزالا وخصوصا معك، جيتك بهذ الردمة ديال العطر. قطرتها بيدي من الزهار والورد لي عندي في الجنان، وجبتلك هدية.

حارس المـــــــــاء :

مين كنبغي نعطر راسي يكفيني نرش عليا شويا ديال الما دلبير وكنحس بالطراوا. الما هو عطري المفضل.

زوجة سيد الحراس:

 خليتني نرشك بهذا العطر وعترجع هايم  وتلقاني بين ذراعيك.

حارس المـــــــــاء :

إذا هيمت تفقد روحي صفاها.

زوجة سيد الحراس :

لمسني وخذ من الصفا ديالي

(تعرض مفاتنها وتحاول الاقتراب منه،

ينفر حارس الماء منها.)

زوجة سيد الحراس :

علاش كتكابر وكتعزز على مرا جميلة مفتونة بك وكالس كضيع زينك وشبابك في خدمة هذ البير.

حارس المـــــــــاء :

لو ما كنت أللا كنكابر كن ضاع صفايا ونقاوتي ويضيع معهم هذ البير.

وعاد عندي العاشقة ديالي دائما حضرا معايا وما نقدرشي نخونها.

زوجة سيد الحراس :

أنا زيني كيتكلمو عليه الناس وكيغنو به كترفضني وكتعش شي وحدا ما عندا وجود. أنت مجنون مجنون سكناك جنية ديال البير.

حارس المـــــــــاء :

 أنا مسكون بالصفا. إذا كان الصفا جنية فأنا كنعشقها.

(تنسحب زوجة سيد الحراس غاضبة)

– ظلام –

الإنارة الثالثة:

حارس الماء لوحده قرب البئر، تأتي خذ الورد وتقف بعيدة عن البئر وهي تحمل جرتها. يلتفت إليها حارس الماء ويقترب منها. في هذه الأثناء تسرق النساء الثلاثة النظر إليهما. زوجة سيد الطاحونة، زوجة سيد الحراس، زوجة سيد الحقول.

حارس المـــــــــاء :

(يوجه كلامه إلى خذ الورد)

علاش دائما كتجي و كتبقى واقفا و كتأمل فيا حتى نجي لعندك ونأخذ السطل ديالك انعمرو بالما ؟

خذ الـــــــــــــــورد :

فين ما كنجي نسقي كنلقى راسي مبهوطا فيك فحال لو أني لأول مرة كنشوف راجل. كنسهى فيك وفي عينك لي كيبرقو فحال الجوهر، وفي وجهك لي دائما ضاحك فحال شي وردة. وأنت كتسقي الناس، وحيث كتبقى النهار كامل كتسقي كتبدا تسيل بالعرق، لدرجة أني كنحس بالعطش وكنتمنى تشرب العراق ديالك، لي كيظهر أن هذ البير أنت لي كترويه بالعراق ديالك. ولابد يكون العراق ديالك حلو، عليها الغرس كيزهر والأرض كتخضر والصبا كتجي وافية.

حارس المـــــــــاء :

مد يدك وفك ظفيراتك

وخلي السالف على ظهرك يرتاح

الهوى اليوم كيشهاك

وقلبي يتلام إذا ما تبلا بهواك

مهلني رعشة حتى نشفى من وجاع لبارح لي كان يروم بكايا.

يا لي حسنك مخفي في حزنك

والصفا لي في عيونك يذكر البير بماه

أنا اليوم بك مولوع وبالعشق أنا خضر كل الفيافي

يا زينة البنات قلبي ليك سرير

ومن دم قلبي نغزلك فراش من الحرير

ادخل قلبي بلا خوف كل الطيور

وصات فراخها تقيم في قلبي

حين كتغيب

– ظلام –

الإنارة الرابعة:

حارس الماء بجوار البئر، يقترب منه كل من سيد الحقول

وسيد الحراس وسيد الطاحونة.

سيد الحقــــــــــول : (يتوجه بكلامه إلى حارس الماء)

باقي ما عيتي من لكلاس ليل ونهار قدام البير ؟

حارس المـــــــــاء :

وأنا سعيد بهذا التعب.

سيد الطـــــاحونة :

ما بقاش كيكفينا الما لي كتسقيهنا خصنا نبنيو ساقية توصل الما حتى لبيوتنا، والمصالح ديالنا ما بقاشي كتحمل النوبة في السقا لي فرضها علينا. رجعتي أنت هو سيد البير.

حارس المـــــــــاء :

أنا ماشي سيد البير أنا حارس الما.

كنسقي الناس حسب النوبة والحاجة ديالوم وأنتما أكثر الناس لي مستفدين من هذ البير أنت سيد الحقول شحال كتستهلك ديال الما باش كتسقي أرضك لي ما عندا حدود.

وأنت سيد الطاحونة شحال كتحتاج الطاحونة من الما باش يدور رحاك.

وأنت سيد الحراس لي كتستغل الحراس ديالك وكتستغفلني وكيجو يسقيو لحسابك ويعلم الله شكدير بهذا الما.

أنتما أكثر الناس لي كتستغلو هذ البير باغين تبنو الساقية توصل لما لخزنات ديالكم، باغين تنشفو البير وتحرموا الناس من حقهم في البير.

سيد الحـــــــــراس :

 احنا صاحبين الوقت واحنا لي كنحمو المصالح ديال الناس.

حارس المـــــــــاء :

وأنا ابن شهيد هذا البير الوالد ديالي مات وهو كيحفر البير باش يحمي حياة الناس. وأنا لي كملت لحفير بعد وفاة الوالد وهكذا استحقت حارس الما. والناس شاهدين على الصفا ديالي.

سيد الحقـــــــــــــول :

احنا ما كنكروش بأنك ابن شهيد وكتعمل شغلك بالصفا، ولكن أصبحتي ضد المصالح ديانا واحنا عندنا الحق في الامتياز.

حارس المـــــــــاء :

أنتما باغين تسيطرو على هذ البير باسم الامتياز باش تحكموا في أرزاق الناس تجوعوا لي بغيتو وتشبعوا لبغيتو.

أنا على كتافي وصية شهيد باش ما نفرطشي في هذ البير. وعاهدت نفسي باش نحمي البير ونسقي الناس بالعدل ونحافظ على حقوقهم في البير.

– ظـــلام –

الإنارة الخامسة:

زوجة سيد الطاحونة وزوجة سيد الحقول وزوجة سيد الحراس يقفن قرب البئر يتابعن حارس الماء وهو يملأ جرارهن. تظهر خذ الورد وفي يدها جرتها. تظل بعيدة عن البئر.تلتفت إليها زوجة سيد الحقول:

زوجة سيد الحقول :

 أنت هي لسحرتي لحارس الما ؟

زوجة سيد الحراس :

كتخبع السحور ديالك مور الحشومة لي كظهرا للناس، هي الجنية لي كلات عقل هذ الحماق ديال حارس الما.

زوجة سيد الطاحونة :

احنا غزلان عليك وهيداك تبلا بك، لو ما كنتيشي سحارا ما تجرجرشي حارس الماء وتخليه تايه بك.

خــــــــذ الورد :

إذا كان الحب والعشق سحور فأنا مسعودا بهذ السحور وفرحانة باش نكون حتى جنية يكفي أن قلبي صافي فحال لما ديال لبير.

زوجة سيد الحراس :

 نفس الكلام كيقولوا حارس الما على الصفا والنقاوا أنت لي سحرتيه بكلامك.

زوجة سيد الحقول :

 ما يمكنشي نخليو هذا السحارا تعيش بينتنا لابد نخافو على رجالنا منا.

زوجة سيد الطاحونة :

 لبسا الحشومة غير لثام باش تخفي الشر والكره لي فيك.

أنت حسدانا احنا غزلان عليك ورجالنا هما موالين الوقت.

خذ الورد :

ملي أنتما غزلان ورجالكم هما سيد الحرس وسيد الحقول وسيد الطاحونة علاش كدوروا بحارس الما. هو غير مسكين كيكدح ليل ونهار باش يحافظ على بير الناس. وعلاش الحقد عليا أنا بنت فحال كل البنات تهز قلبي لحارس الما لأنه نقي وقلبو صافي وخدام بعراقو وكيحمي حقي في هذا البير.

حارس المـــــــــاء :

(يتوجه بكلامه إلى النساء الثلاثة)

قدامكم جميع وأنتما شهود على كلامي كنعلن خذ الورد مراتي

زوجة سيد الحراس :

 سحراتك يا حارس الما خذ الورد ولابد باش نطيروك من قدام هذ البير.

– ظلام –

الإنارة السادسة:

خذ الورد تزف نفسها لحارس الماء قرب البير.

خذ الـــــــــــــورد :

 جيتك عروسا يا حارس الما

لأنك علنتيني مراتك قدام الناس

حارس المـــــــــاء :

وأنا ليلك عروس يا خذ الورد

أنت والبير في حمايتي

نرقصو رقصة عرسنا

خذ الــــــــــــــورد:

 بوحدنا في ليلة عرسنا

لا جار ولا صديق يهنينا

ولا حبيب يفرحنا بهدية

ولا زغاريت تونسنا

وأنا لي عنزغرت لعرسنا

(تزغرد خذ الورد والأجمل أن تجعل الجمهور يزغرد معها).

– ظلام –

الإنارة السابعة:

قرب الطاحونة يجتمع كل من سيد الطاحونة وسيد الحقول وسيد الحراس.

سيد الحقـــول :

 تزوج حارس الماء بخذ الورد وجميع الناس كيتكلمو على جمالها.

سيد الطاحونة :

حتى حاد ما كان رد البال لحسن خذ الورد،  كيفاش قدار هذا المزلوط ديال حارس الما يفطن لجمالها ؟

سيد الحراس :

كيقولوا هي لي سحراتو وهي لي علمتو سحر الكلام. ومادام مغروم بها لازم تكون هي نقطة ضعف حارس الما، ومنها نقدروا ندخلولو نتهناو منو ونطيشوه من البير.

سيد الحقول :

كيفاش قدرت خذ الورد تداري حسنها علينا بعدما سمعت الناس كيتكلمو على جمالها لقيت راسي حتى أنا مولوع بها لابد باش نجرجروها ونتمتعو بحسنها. وهكذا ندلو حارس الما ونطيشوه من البير.

سيد الطاحونة :

 نتناوبو ولي يقدر يغويها يتمتع بها.

سيد الحراس :

حارس الما كيقضي الليل كيعس على البير وكيحفرو وكتبقى خذا الورد بوحدها وكل واحد وجهدو. لي يقدر يدوخا يتمتع بها. لكن بلا عنف غير بالحنان.

نعملو القرعة باش نعرفو شكون الأول والثاني والثالث.

(يعملون القرعة: الأول سيد الحراس الثاني سيد الطاحونة الثالث سيد الحقول)

– ظلام –

الإنارة الثامنة:

خذ الورد تجلس على عتبة بيتها تغزل الصوف وهي تدندن أغنية. شعرها متدلي على ظهرها كشلال وعينيها المكحلتين كغزال وخذيها النديتين كوردة الصباح.

يقبل عليها سيد الحراس وفي يده صندوق صغير. عندما تفطن به ترتعب وتتناول وشاحا تغطي به أسها.

ينحني أمامها سيد الحراس ويضع الصندوق بقربها ويكلمها.

سيد الحراس:

ما تخافشي الحبيبة كيقولو عليك سحارا وأنا قابل تسحرني غير لمسني ونرجع مبهلل.(سيد الحقول وسيد الطاحونة يتجسسان عليه)

ما تحرمنيشي من هذ الطراوة ديالك ومن هذ النور لي طالع من وجهك أنت كتبرق كثار من الذهب والجوهار . انت لي خليتي الذهب يكون ذهب والجوهار يكون جوهار. انت لي كتبرق هما غير سارقين منك (يمد لها الصندوق الصغير)

خذ هذ الذهب والجوهار بلا بك ما عندوم قيمة علا دكشي جبتهوم لك كل شي ديالك وحتى أنا ديالك، غير لمسة منك، غير دوز خذك على خذي ونحمق أنا باغي نحمق.

(سيد الحقول وسيد الطاحونة في مخبئهم)

سيد الحقــــول :

كيفاش يمكن يخرج كلام جميل وساحر من جثة حلوف وهو دائما كيخرخر ماشي كيتكلم

سيد الطاحونة :

كيظهر لي كيقرب من خذ الورد كيتعلم لكلام الجميل. وبديت كنخاف على راسي من خذ الورد ما عمري شفت شي مرا وعرا فحالها كتعصرو عصير شوف كيف كيقفقف.

خذ الـــــــورد : (توجه كلامها لسيد الحراس)

حاميها حراميها. كيفاش امنوك على حياتهم اسيد الحراس (بسخرية) دبا عاد عرفت علاش حارس الما مقلق على البير.

انت روحك فحال شي كربة متقوبة عمرها ما تعمر عندك مرا جميلة وما كفياكشي.

لا جمال ديالي ولا جمال الدنيا كاملا يكفيك لأنك كربة متقوبة.

يا سيد الحراس كنشفق على حياة الناس منك أما إذا قربت خذي من خذك يلصق فيه العفن لي ساكنك.

(يحمل سيد الحراس صندوقه وينسحب)

ترجع خذ الورد إلى غزلها ودندنت أغنيتها. يقبل سيد الطاحونة وينحني أمام خذ الورد.

سيد الطاحونة :

 أنا ما جيتشي نطلب القرب منك

تكفيني منك نظرا أنا الجثة ديالي

ما تليقشي بالجسم ديالك لي كيعلم

الحرير بالرقة ديالو نطرا من عيونك

ونغرق فيهم أنا باغي نغرق

باغي نضيع في الأعماق ديالك

وما بغيتشي نرجع أنا شبعت الدنيا.

من بعد ما شفتك ما تحرمنيشي من الغراق

وخذ كل ما كنملك أنا والو خارج عيونك

(سيد الحراس إلى سيد الحقول يتابعان ما يحدث)

سيد الحراس :

رجعاتوا زاهد في الدنيا من بعد ما كان كيكدس في المال لي كيربحو من الطاحونة، كيخلط الزرع مع البلوط ويبيعو للناس.

سيد الحقــول :

ما عرفتشي شنو عيوقع لي من عتوصل نوبتي ؟

خذ الورد (توجه كلامها لسيد الطاحونة)

سير را أنت غارق في الطمع والعفن لي جمعتيه من سرقة نقاوة خبز الناس.

ما تقبلشي عليك حتى قنا خانزا تغرف فيها.

(ينسحب سيد الطاحونة وترجع خذ الورد إلى غزلها ودندنت أغنيتها)

يظهر سيد الحقول ينحني بقرب خذ الورد، تهمله وتستمر في غزلها)

سيد الحقول :

 واش أنا ذنبي إذا شميت عطر وردة واتبعتو حتى لقيت راسي قدامها.

أولا ذنب الوردة لي فاح عطرها.أللا أنا قضيت حياتي كلها بين الشجار والورد والزهار وما عمري شميت ريحتهوم.كيفاش ليوم طاوعني الشم ديالي وفطنت لريحتك.

واش نقدر أللا نطمع في تنهيدة منك باش نشوم ريحتك ونتعلم نفطن للريحة الطيبة.

(سيد الطاحونة إلى سيد الحراس في مخبئهم)

سيد الطاحونة :

 ريحتو ينفر منها الضباع كيفاش يقدر يميز الريحة الطيبة

خد الــــــورد : (إلى سيد الحقول)

لي روحه متعفنة عمرو ما يشم الريحة الطيبة ولو يعوم في بحار من العطور. أنت لي حرمتي الناس من الهوى النقي بعدما قلعتي شجار الغابة وسيطرتي على أرضها.

(ينسحب سيد الحقول وتظل خذ الورد لوحدها تحاول دندنت أغنيتها لكنها تفشل)

خذ الــــــورد :

كيظهر أن الهنا عيرجع غير غنا وإذا ما كان الهنا كيفاش عيكون الغنا ؟

كيظهر عوض عنونس راسي بالغنا نوض نخمم في هذا المحنة بلي سيادنا ما عيجي من موراهم غير البلا.

( تقول خذ الورد هذ الكلام والحزن باد عليها)

–         ظلام –

الإنارة التاسعة:

حارس الماء وخذ الورد لوحدهما قرب البئر.

حارس المـــــــــاء :

هذ الليلا أخذ الورد كنحس بروحي مقلقا شي حاجة في الداخل ديالي كترنح.

خذ الــــــــــــــورد :

 ما يكون غير التعب احارس الما.

علاش ما ترتحشي هذ الليلة وأنا نكلس نعس على البير.

حارس المـــــــــاء :

ما نقدرشي نرتاح وأنا بعيد على البير.

وهذي وصيتي للك.

إذا وقاع لي شي حاجة البير أمانة بين يدك لأنك الوحيدة لي قادرا على هذ الأمانة لأنك طاهرا ونقية فحال البير، ولابد باش تقاتل وتحمي البير.

خذ الـــــــــــــورد :

وجعتني بكلامك احارس الما.

فحال لي كتودعني ومعنشوفكشي من بعد هذ الليلة.

حارس المـــــــــاء :

هذا هو الهم لي عندي ولابد تقاسمو معيا.

خذ الـــــــــــــــورد:

بعد هذ الكلام لي قلتيه عنسهر الليلا مع الخوف حتى نشوفك في الصباح، بعدما كنت كنسهر مع خيالك في الليالي لي كنقضيها بوحدي.

حارس المـــــــــاء :

تعلم بعد هذ الليلا تكون قويا وما تخليشي الخوف يهدك لأن من بعدي البير في خطر إذا ما كنتيشي قادرا تغضب.

(تسلم خذ الورد سلة بها أكل لحارس الماء،

يقبلها ويضمها ويبدأ بشمها وكأنه لن يراها بعد الليلة، تنسحب خذ الورد ويظل حارس الماء لوحده قرب البئر).

– ظلام –

الإنارة العاشرة

يقف حارس الماء قرب البئر وسط ظلام كثيف.

يقترب منه ثلاث رجال ملتمين يهجمون على حارس الماء يحاول التخلص منهم ومواجهتهم لكنهم يتغلبون عليه يخنقونه ويرمون به في البئر.

– ظلام –

الإنارة الحادية عشرة

خذ الورد تطوف حول البئر وهي متوترة

خذ الــــــــورد :

حارس الماء ….. حارس الما

فاين أنت…… فاين أنت

(تقعد قرب البئر تبدأ بالبكاء)

خــــــذ الورد :

 قلي يا بير فين مشى لي كان كيحميك؟

كان سهران معك ومو نسك

أنت لي عرفو فاين مشى

(تقف فجأة وتطل على البئر وتبدأ بالمنادات)

حارس الما…………حارس الما………….(تصرخ)

 حارس الما غارق في البير .. ميت ما كيتحركشي

شكون غرقك…… غدروا بك

قلي يا بير أنت لي شاهد أنت لي عارف

شكون قتل لي كان حاميك

كنت كتحمي ماهم يا حارس الماء باش يعيشو وقتلوك…

سرقو حياتك….كنت كتعلمهم الصفا والوفا وخانوك…

يا ناس….حارس الما مات………..مات حارس الما

عذرو به….يا ويلهم من غضب الما

(يظهر كل من سيد الحراس و زوجته وسيد الحقول وزوجته وسيد الطاحونة وزوجته)

 خذ الـــــورد:

مات غدار حارس ماكم غرقوه في البير

قتلوه لأنه ما بغاش يفرط في الأمانة ما بغاش يخون بيركم

(يتقدم الرجال الثلاثة ويتحلقون حول البئر يتناولون حبلا

ويربطون أحدهم فينزل إلى البئر يظهر حارس الما

يحملوه ويخرجوه من البئر..يمدوه على الأرض تقعد خذ الورد

قرب حارس الماء).

خذ الـــــــورد :

 عنبقى كالسا هنا قدام ابير حتى يقول لي

شكون لي غدار بك هو الشاهد الوحيد على الجريمة

(يرفع الرجال الثلاثة حارس الما ويذهبون به)

– ظلام –

الإنارة الثانية عشرة

خذ الورد  لوحدها قرب البئر يقترب منها كل من سيد الحراس وسيد الحقول وسيد الطاحونة

سيد الحراس :

 هذ الحزن وهذ الهم عيقتلك آ خذ الورد واجبنا نحميواك منو

سيد الحقول :

 عندي دار ما تغلاشي عليك خدها

وما تبقاشي بوحدك في هذ الخلا

سيد الحراس :

 والحراس ديالي يخدموك أنت غير آمر

عتعيش معززة مكرمة بينتنا

سيد الطاحونة :

 ومكلاتك وشرابك وكسوتك وكل ما تشهاه نفسك أن مسؤول عيله

خذ الــــــــورد :

 بشرط (تقف وتتأملهم بحركة مثيرة)

أنكم تسمعوا هذ لكلام

(يقترب منها الرجال الثلاثة ويستمعون إليها باهتمام )

خذ الــــــورد :

 زارني هذ الليلة حارس الما في المنام وأمرني

باش نبلغكم بالوصية ديالو

ثلاثتهم = شقال ؟

خذ الــــورد :

 ظهر لي واقف فحال شي شجرة عاليا والما كسيل منها

فحال شي شلال وقال لي:

لا بد نقضي مع كل واحد منكم ليلا ويبقى السر ديال الليلة بيني وبين كل واحد

منكم. هذا ما يخبر لاخور بالسر ديال الليلة وقبل ما تبدا الليلا

لا بد باش يشرب كل واحد منكم كاس ديال الما دلبير.

وإذا ما حضرتوش الليلة ونفدتو لوصية لبير عيغضب وينشف من الما

هذا هو شرطي إذا بغيتو نقبل العرض ديالكم

(يردون عليها بكلمة واحدة)

 لا بد نضحيوا باش لحميو الناس من العطش

خذ الــــــورد :

 هذ الليلة من نصيب سيد الحراس

 والليلة الثانية من نصيب سيد الحقول

 والليلة الثالثة من نصيب سيد الطاحونة

 ويبقى السر بينتنا

ثلاثتهم = موافقين آ خذ الورد (يتلهف)

– ظلام –

الإنارة الثالثة عشر

تجلس خذ الورد لوحدها قرب البئر تأتي إليها كل من زوجة سيد الحراس

وزوجة سيد الحقول وزوجة سيد الطاحونة

خذ الــــــــورد :

 طلبت نشوفكم باش تكونو شاهدين

زوجة سيد الحراس :

 علايش عنشهدو آ خذ الورد؟

خذ الـــــــــورد :

عتشهدو على الليالي لي عنقضيها مع رجالكم

أنا اتفقت معهم باش نقضي مع كل واحد منهم ليلة عاشقيني وباغين يزهاو معيا

ويتمتعو بجمالي بغيتكم تحضرو وتشفو وتسمعو

وانتوما متخفين ويبقى السر بينتنا.

ما تخافوشي أنا معنشرقشي منكم رجالكم

أنا  عندي غرض نعرف شدايرين في هذ البلاد والعباد

– ظلام –

الإنارة الرابعة عشر

الليلة الأولى

خذ الورد تجلس في مضجعها وهي في كامل زينتها

يدخل عليها سيد الحراس

سيد الحراس :

 جيتك حسب لوصية.

خذ الــــــورد :

اكلس

(تقدم له خذ الورد كوبا مملوء بالماء)

اشرب هذا الما حسب لوصية.

باش تطهرو تبدا ليلتنا

(يتناول سيد الحراس الكوب ويشربه دفعة واحدة وبلهفة)

سيد الحـــراس :

 آ ح ح (يتلذذ)

(النساء الثلاثة يتابعن ما يحدث وهن متخفيات)

خذ الــــــورد :

 واش عارف شنو شرابتي ؟

السم غدي تموت وعتموت على خاطرك

لكن…. إذا بغيتي تعيش عندي الدوا ديال السم بشرط تكربكلش

وبغيت نشوفك مدلول وضعيف وكتقفقف بالخوف داكشي لي دوزتيه على الضحايا

ديالك لي اعتقلتهم وغبرتيهم وكنت كتزها عليهم بالجبروت ديالك والقوة ديالك

وكنت كتمتع وأنت كتشوفهم خايفين باكيين  ومدولين.

سيد الحراس :

 نكر أللا نكر بكل شي غير اعطيني الدوا

ديال السم لي شرابتوا أحاي على تصيدا هذي

خذ الورد :

 أنا وعدتك إذا كرتي نعطيك الدوا ديال السم

أنا إذا وعدت كنوفي ماشي فحالكم يالاه كر…

سيد الحراس :

كان واحد الراجل حطاب كيجمع للناس الحطاب من الغابة وكيبعو وبه كان عايش. لما بدا سيد الحقول كيقلع الشجار ويسيطر على أرض الغابة

بدا كيحياح الحطاب وسفل بنا مع الناس وكان

كيقول أنا سيد الحراس وسيد الطاحونة وسيد الحقول متفاهمين باش نسيطر على الغابة وترجع ملكنا

حرفتنا معه وخافنا يتبعوه الناس وتوقع الحيحا.

كنا اغتصبنا واحد البنت أنا وسيد الحقول وسيد الطاحونة واتفقنا باش نتهموا الحطاب باغتصاب البنت باش نتهانوا منو، ونعملوا شغلنا على خاطرنا بلا سفلى.

جبوه الحراس ديالي لواحد الدار عندنا في الغابة

وفيها كوري عندنا فيه الغنم والبقار

وبديت كنعدب فيه باش يعرف بالجريمة ديال الاغتصاب

خذ الــــورد :

 ذاك شي لي عملتي في الحطاب بغيتك تعملو في راسك

(يتناول قطعة توب ويغمض بها عينيه ويبدا بالمشي على يده ورجليه وهو ينبح)

ومن بعد لبسناه كسوا ديال النسا وقلنالو يبدا يشطح

خذ الـــــــورد :

 هاك البس واشطح (تقدم له لباس نسوي)

(يلبس سيد الحراس اللباس النسوي ويبدا بالرقص)

سيد الحراس :

 ومن بعد مشينا به للكوري ديال البقار

وقلنا لو يمشي على يدو ورجلو  فوق التبن وياكل من ماكلا ديال البقار

خذ الـــــورد :

 وشكان كيعمل الراجل مسكين.

سيد الحراس :

كان كيبكي وكيقول

أبا تور ويما بقرا أنا خوتي

غير تمساخت ورجعت بنادم

موه – موه – موه –

سيد الحراس :

 ها أنا كريت بلي عملت واعطيني الدوا ديال السم

خذ الـــــورد :

باقا حاجة أخرة خصني نعارفا

شكون لي قتل حارس الماء وغرقو في البير؟

سيد الحراس :

 ماشي أنا أللا خذ الورد لكن نقولك

شكون قتلوا – هذاك سيد الطاحونة

وسيد الحقول هما لي قتلوه باش يسيطرو على البير هما كيجمعو لفلوس

وأنا حيت السيد الحراس كندي اتهمة

خذ الـــــورد :

 التهمة والفلوس قلي هذاك

الحطاب مسكين شعملتو به

سيد الحراس :

 فا ضلو لبريق

خذ الـــــــورد :

 شنـــــــو ؟؟

سيد الحراس :

 حماق رجاع حماق وتايه في الدنيا

وكيقول غير موه – موه –

لكن دبرنا على عائلتو بشي بركة

خذ الــــــورد :

 شكون عطاه هذ ابركة ؟

سيد الحراس :

  اعطيناهلو من صندوق الماعونا

خذ الــــــورد :

 انتما ديما رابحين كتعملوها كاحلا

وكتبانو ناس مزيانين حنان

اتهمتو الراجل بالباطل وهو كان كيدافع

على حق الناس في الغابة وفي الأخير عطيتوه

شي بركة (بسخرية) من صندوق الماعونا

حلوا هذي قليتو الناس من زيتهم ضيعتوهم في راجل وضيعتوهم في فلوسهم

وأنتما خرجتو رابحين ومزيانين مع الناس على حلاوا

سيد الحراس :

 النس ديانا ضريفين كيسمحو دغيا

 كينساو وعاد هما ما عرفين والو على صندوق الماعونا

خذ الــــورد :

 اسمع هذ الكلام لي عنقوللك يبقى سر بينتنا

 إذا بغيتي ما نفضحكشي قدام الناس

بعد الليلة الثالثة عتظهر واحد ليمارا على الراس ديال لي قتل حارس الما

ما تقولا لحد باش الناس تعرف شكون لي قتل حارس الما

سيد الحراس :

 أنا مزاوك غير اعطيني الدوا ديال السم

والله ما نفتح فمي

(تمد له خذ الورد قارورة صغيرة)

خذ الــــــورد :

 اشرب منا وحد لقطيرا وعتشفا

( يتناول سيد الحراس القارورة ويشرب منها جرعة)

سيد الحراس:

 صافي هذ لقطيرة عتقضي على السم

خذ الـــورد :

 ياله نوض خوي وعندك تنسى الاتفاق

سيد الحراس :

 والله ما ننسى (يخرج مهرولا)-

– ظلام –

الإنارة الخامسة عشر

الليلة الثانية

خذ الورد تجلس في مضجعها وهي في كامل زينتها يدخل عليها سيد الحقول

سيد الحقول :

ها أنا جيت حسب لوصية

خذ الـــــورد :

 اكلس

(تتناول خذ الورد كوبا من الماء)

 تفضل اشرب هذ الكاس حسب الوصية

باش تطهر وتبدا ليلتنا

(النساء الثلاثة يتابعن ما يقع وهن متخفيات

يتناول سيد الحقول الكأس ويشربه دفعة واحدة وبلهفة)

سيد الحقول :

 آ ح ح (يتلذذ)

خذ الـــورد :

 واش عارف شنو شرابتي؟

هذاك السم الهاري لي شربتي عيقطعك طروفا

سيد الحقول :

 آحاي …ي…ي

خذ الــــورد :

 لكن إذا كريتي وقلتي كيفاش ديرتي

حتى وليتي سيد الحقول نعطيك الدوا ديال السم

سيد الحقول :

 نكر آللا خذ الورد نكر بكلشي

غير اعطيني الدوا ديال السم

خذ الـــورد :

 ياله كر

سيد الحقول :

 كان عندي واحد الطريف ديال الأرض بجنب الغابة

وكنت كنزرعو ومين كيوجد الزرع

كنبيعو لسيد الطاحونة

واحد النهار وأنا كنتحسب مع سيد الطاحونة

وسيد الحراس يجي وفتر عليا وحد الفتوى

– حيث هو كييعرف اقانون مزيان- قالي :

علاش متكبرشي أرضك؟ هذ الشبر ديال الأرض

لي كتزرعو  يلاه كتكلو

قلتلو كيفاش عندير كنبر الأرض وأنا مزيار

بالغابة وهو يقول لي بوضع اليد قلع الشجار

وزرع الأرض وأنا نحميك بلا ما تنسى خويك

وأنا نبدا نحط يدي على الغابة كنقلع اشجار ونزرع الأرض

وكنقول هذي أرضي أنا ما سرقت أرض هما لي

قالوا فيما حطتي يدك هديك أرضك

عل حلاوا غير حط يدك تربح أرض

علا قانون شحال غزال

عندك شي واحد تبالو يحط يدو على شي أرض

راه ما بقا علايش تحطو يدكم

خذ الــــورد :

 وهكذا وليتي سيد الحقول

سيد الحقول :

 ها أنا كريت واعطيني الدوا ديال السم

خذ الــــورد :

باقي خصك تكر بحاجة أخرى

شكون اقتل حارس الما

سيد الحقول :

 ماشي أنا هذاك لحريمي ديال مول الطاحونة

وصحبو سيد الحراس

خذ الـــورد :

اسمع هذشي لي عنقولك يبقى سر

بينتنا ولازم نحافظ عليه إذا بغيتي

ما نفضحكشي قدام الناس

بعد الليلة الثالثة عتظهر واحد ليمارا

على الراس ديال لي اقتل حارس الما وداك

الساعة الناس هي لي عتحكم عليه

سيد الحقول :

 كن هانيا آللا خذ الورد السر محفوظ

واعطيني الدوا ديال السم

(تمد له خذ الورد قارورة صغيرة)

خذ الورد :

اشرب منها قطيرا

 (يتناول سيد الحقول القارورة ويرتشف منها رشفة)

سيد الحقول :

 صافي تداويت من السم

خذ الـــــورد :

 ياله خوي وعندك تنسى

سيد الحقول :

 والله ما ننسى (يخرج مهرولا)

–         ظلام –

الإنارة السادسة عشر

الليلة الثالثة

خذ الورد جالسة في مضجعها وهي في كامل زينتها يدخل عليها سيد الطاحونة.

سيد الطاحونة :

 ها أنا جيت حسب لوصية

خذ الــــــــورد :

 اكلس (تتناول كأس من الماء)

 اشرب هذ الكاس ديال الما حسب لوصية

باش تطهر وتبدا ليلتنا

(النساء الثلاثة يتابعن م يقع وهن متخفيات)

(يتناول سيد الطاحونة الكأس ويشرب دفعة واحدة)

سيد الطاحونة :

 آح – ح – ح (يتلذذ)

خذ الـــــورد :

 واش عارف شنو شرابتي؟

شربتي السم الهاري وغادي تموت على خاطرك

سيد الطاحونة :

 أحاي – ي – ي….

خذ الـــــورد :

 لكن إذا بغيتي تعيش عندي الدوا ديال السم

بشرط تكر وتقول كيفاش جمعتي هذ الفلوس

كاملين حتى وليتي سيد الطاحونة

سيد الطاحونة :

 نكر آللا خذ الورد نكر بكل شي غير اعطيني الدوا ديال السم

خذ الـــــــورد :

  ياله كر

سيد الطاحونة :

 كان الزرع قليل وكان الجوع هالك الناس

وبديت كنخلط كليبا[1] مع الزرع وكنطحنوم وكنبيع الطحين للناس

خذ الــــــــورد :

وشكان كيوقع للناس؟

سيد الطاحونة :

 الناس ما كان عندوم ماياكلو والجوع كافر

وحيث كليبا كتحشش الناس كاملا رجعت محششا

حسيت براسي مزيان كنوكل الناس وكنحششوم والناس فرحانا

الخير فاض عليا والهنا ما كاين لا شكوى لا فوضى

الناس كتقيل مرخيا مع راسا مرامرا كتشبك بالطبل والغايطا

كل شي ارجع هداوي ولكن بعاقلوم حتى واحد

ما كيعمل الفوضى الشهادة لله.

علا ناس عندنا شحال حلوين شكون فحالهم واكلين ودربينها بنحشيشا

حتى دخال علينا الطحين ديال لمريكان

خذ الورد :

إيوا خسروك البيعة وشريا

سيد الطاحونة:

 بالعكس فيكونا

اطلقنا واحد الإشاعة بين الناس

أنا وسيد الحراس وسيد الحقول

قلنا لهم هذا الطحين ديال الكفار

مخلطيناه بشي مادا كترجع بنادم كافر

ما كيعراف لا يماه ولا بباه

والناس كرهت الطحين ديال لمريكان

واجملتو أنا وبديت كنخلطو نبيعو

والناس لي كتعيش غير بالماعونا كنا كنخدمهم

ونخلصوهم بالكحين بحاق ما كنقولولمشي الطحين ديال لمريكان

كانو يبقاو بالجوع وما يكلوهشي الناس كتخاف من الكفار

خذ الـــــــــــورد :

 وهكذا وليتي سيد الطاحونة وحشحشتي لفلوس مع راسك

سيد الطاحونة :

 وها أنا كريت واعطيني الدوا ديال السم

خذ الــــــورد :

 باقي خصك تكر بحاجة أخرى

شكون اقتل حارس الما وغرقو في البير؟

سيد الطاحونة :

 هذاك لحريمي ديال سيد الحقول وصاحبو سيد الحراس

خذ الـــــورد :

 اسمع هذ الكلام لي عنقولك يبقى سر بيناتنا

بعد هذ الليلا هذي عتظهر  ليمارا على راس ديال لي قتل حارس لما

وإذا ما حفظتيشي على السر نفضحك بين الناس

سيد الطاحونة :

 كن هانيا أللا خذ الورد السر محفوظ

واعطيني الدوا ديال السم

(تمد له خذ الورد قارورة صغيرة)

خذ الــــــورد :

 اشرب منها قطيرا

(يتناول سيد الطاحونة القارورة ويرتشف منها رشفة)

سيد الطاحونة :

 صافي عنعيش؟

خذ الــــــــورد :

 ياله خوي وعندك تنسا.

سيد الطاحونة :

 والله ما ننسى (يخرج مهرولا)

– ظلام –

الإنارة السابعة عشر

يتحلق حول البئر كل من سيد الحقول وزوجته وسيد الحراس وزوجته

وسيد الطاحونة وزوجته، كلهم يلبسون قبعة أمريكية الصنع من نوع (نايك)

خذ الورد لوحدها تتطلع إليهم واحدا واحدا

يصعد سيد الحراس على جدار البئر

سيد الحراس :

 بعدما مات حارس الماء قررنا

نبيعو هذا البير في المزاد العلني

ولي عيربح الدلالة هو لي عيرجع مسؤول على البير

ياله شكون قال…

زوجة سيد الحراس :

 مليون عليا

سيد الحراس :

 مليون على مراتي – شكون يزيد قال ميلون

سيد الحقول :

 ميلون ونص عليا

سيد الحراس :

 مليون ونص على سيد الحقول

شكون قال أكثر

سيد الطاحونة :

 زوج مليون عليا

سيد الحراس :

 زوج مليون على سيد الطاحونة

شكون يزيد

زوجة سيد الحراس :

 زوج مليون ونص

سيد الحراس :

 زوج مليون ونص على مراتي

شكون يزيد

(يشكل الجميع حلقة ويبدأون بالوشوشة بينهم وتظل خذ الورد وحدها تراقبهم)

سيد الحقول :

 زوج مليون ونص ودرهم علينا كاملين حنا على الشركة ديانا

سيد الحراس :

 زوج مليون ونص ودرهم على الشركة ديانا

آ – ديالهم –

مازاد حد –واحد- زوج – ثلاث

خذ الورد تقترب من البئر وتتأملهم جيدا تطل على وجه كل واحد منهم وتقول :

خذ الـــــورد :

 لي في كرشو لعجينة كامل البس طربوش

(تردد هذه الجملة أكثر من مرة)

– ظلام النهاية –

2008.04.30 العرائش

[1] كليبا : نوع من النبات ينمو بين الزرع و هو شبيه له و مخدر