العرائش نيوز:
عــــــــفريــــــــــت
*****************
بغيت نركب الموضة هد العام
نحلم مع الشباب خير وسلام
و نقول هدا عيد الحب علاش الاّ
ما نديرش حتى أنا بحالهم حفلة
و نهديلك نونوس عليه قلب احمر
و شي وردة معطّرة بالنّْـدى تقطر
و نقولك كل عام وأنت حبيبَتي
بحال كاظم..أو نغنيلك أمُولاتي
لقيت الشيب بدا يبدل لمعاني
وبالرزانة عقلي ينصح كْيانـي
و انت ما بقيتي قد لكلام لمنمق
و هّديّة بْسيطة وْلا مشموم مزوق
انت أسمى وحضنك منبع الدّفى
انت الحياة ومجرى الجود والـوْفا
انت لغرام المتجدْد على طول ليام
و انا فسْبيل هْناك ديما داك الهُمام
شبيك لبيك أنا عفريت بين يديك
آمري آعمارة داري بروحي نفديك
طول ما الشّْهور ولعـوام زايـدة تتوالى
و طْلاوتك تزيد طْلاوة آمولات الخالة
