العرائش نيوز:
المخرج السينمائي عبد السلام الكلاعي وخلعة الكوميسريا
بقلم : المخرج عبد السلام الكلاعي
اليوم مشيت مع ولدي شادي للكوميسارية باش يخرج البطاقة الوطنية لأول مرة. و تعمدت أنني ما نهضر ما نتكلم ونخليه هو يقوم بالإجراءات كاملة. ما أثارني هو الإستقبال الطيب الذي استقبل به والمعاملة الجيدة التي عومل بها ونظافة المكان و توفره على يافطات الإرشاد.
وتذكرت كيف كانت كوميسارياتنا، ماشي فسنوات الرصاص، لا.. غير فأواسط الثمانينات ملي مشى معايا الوالد باش نخرج البطاقة الوطنية لأول مرة. كانت الكوميسارية خانزة ومضلامة و كتجيب الخوف بشكل متعمد، باش ولو أنت ماجي غير تخرج البطاقة خصك تخرج منها مخلوع ومرعوب و عارف و متأكد أن المخزن ما معاه لعب و راه إذا شدك يسلخ والديك و عاد يغبرك. طلعنا أنا والوالد لواحد المكتب فالسطح و حنا نلقاو الضابط المكلف بالبطاقة الوطنية يخنق رجل بدوي لابس جلابة ذ بال الصوف قهوية وجالس على كرسي. دار الضابط عندنا وحنا واقفين فالباب وأنا نقول مع راسي: “صافي.. مشينا فيها.” وهو يدير واحد الإبتسامة عريضة ورحب بالوالد وبي وقالنا نجلسو وشرحلنا علاش كان كيخنق داك البدوي المسكين: “أنا كنسولو على شمن دوار خلق فيه وهو كيقولي العوامرة.. عييت نقولو الدوار وهو كيقولي العوامرة.” و دار عند ديك السيد اللي كان باقي كيحاول يطلع النفس باش يولي بالروح وجره من جلابته و بدا ياخد له البصمات. وفكل بصمة كان كيخسرها داك الراجل حيت كيضغط على الورقة كان كيعطيه الضابط واحد الدلقيشة للفم حتى كيدوخ قبل ما يبدل الورقة ديال البصمات و يعاودو من الأول.
المهم القضية كانت أقرب لإستنطاق متهم بتهديد أمن الدولة في معتقل سري منها لأخذ بصمات مواطن ما داير لا بيدو ولا بالعود و ماجي غير يدير “البيتشاقا” بحال اللي كيقول ديك المسكين. من بعد قال له: “سير طلع تما.” دار البدوي المسكين جهة الحيط و عيا يقلب فاين غادي يطلع وهو يلقى غير واحد الكرسي مشى وطلع ووقف فوق منه. دار الضابط اللي كان كيحط الورقة ديال البصمات فواحد الملف وهو يلقى صاحبنا واقف فوق الكرسي وهو يجي بشويا حتى وصل حداه و جمع بيه داك الكرسي بنص وجابه كاو مجبد فالأرض و قالو: “قلت لك أ الحمار وقف هنا حدى الميترو باش نعبر لك الطول ماشي تطلع فوق الكرسي.” أنا والوالد سمعناه قاله طلع لهيه، بالحق حرام واش قدرنا نهضرو، بقينا ساكتين بحال الأغلبية الصامتة اللي كانت معمرة المغرب فديك الوقت. ماشي حنا حماق نهضرو! من بعد نزل عليه باللوحة اللي كياخدو بيها القياس على دماغه حتى كان غادي يشقوله وقرا القياس ومشا يقيده.. المهم ملي قتل ديك الراجل قتيل وعطاه ديك التوصيل و مشا داك المسكين يجر أذيال الذل و العار و المهانة والحڭرة و الرعب و الخوف من سيدنا المخرن. استدار نحوي الضابط وقال لي:”أجي أولدي.” قلت مع راسي: “صافي.. اليوم غادي ناكل ما كلا الطبل نهار العيد.” و لكن الضابط رسم ابتسامة عريضة على وجهه و هو يدعوني بإشارة من يده أن أجلس، وهو كيتحدث مع الوالد و كيسوله على أحواله، فاسترجت أنفاسي و قلت لراسي: “أن الحمد لله أن الدنيا في سنوات الرصاص كانت بالوجهيات و الآخرة ستبقى دائماً بالزراوط.” كل هذا تذكرته اليوم و أنا أرى إبني شادي يعامل معاملة حسنة في كوميساريتنا هو وغيره من المواطنين والمواطنات وقلت مع راسي: “إيوا المهم.. على الأقل الكوميساريات ديالنا ولاو إدارات نقية واللي خدامين فيها مأدبين وما بقاوش بحال مخافر التعذيب وعلى الأقل ما بقاش خصك توجد حناكك للتصرفيق إذا بغيتي البيتشاقا”.
