العرائش نيوز:
بقلم: عبد السلام السلطاني
بغيت نكون فنان ..
يمجّد الجمال ..
و يضرب للربيع الفال ..
ما خلاونيش ..
بغيت نشوف الدنيا ..
بعينين لغزال ..
و نسدي لمحبة ..
حبوب من كبال ..
قبل الصابة ..
أو تمر ..
من شجرة فالغابة ..
ما صابو ( خبث ) المحال ..
ما خلاونيش ..
بغيت نكون كي تربيت ..
نزهد المال ..
و ندرّر صروف لعيال ..
انحارب كلمة يا ريت ..
و نشوف مع نصيب الحال ..
ما خلاونيش ..
بغيت نوصّل أغنية ..
قرب ضحاها ..
من ساعة الزّْوال ..
و نلملم ..
بالكْياسة .. بالسْياسة ..
كلمة .. ميتمة .. مگدّمة ..
زاجها مشتت فمقال ..
ما خلاونيش ..
بغيت الباقي فعمري ..
نعيشو عابد .. حامد ..
فمحراب النخوة ..
و زين لقوال و لفعال ..
ما خلاونيش ..
بغيت نختم بموال ..
يفهم به لبيب ..
درس الگْبّال ..
و همزة السؤال ..
و المآل ..
ما بغاوش ..
ما خلاونيش .. !
………..
هانا بحري ..
مزيّر حبالي ..
فالمركب العالي ..
بين لمراسي جوال ..
عوّال ..
إذا ما نكون نهار ..
گهار ..
نكون بعدا هْلال ..
ينشر السّْنا ..
ما يعميش .. !