العرائش نيوز:
خبر سار من اجل القصر الكبير
في اتصال قبل قليل مع احد الاصدقاء بمدينة العرائش و الذي بحكم وظيفته التي تسمح له ان يكون بالقرب من أصحاب القرار .
اتصال صراحة فاجأني فلقد انقطع التواصل بيننا منذ مدة ، فقلت مع نفسي الله ايسمعنا اخبار الخير . و بالفعل كانت اخبارا سارة جدا ، لدرجة لم نبالي حتى للسؤال بيننا عن احوالنا بعد طول الفراق . حيث قال لي بالحرف اسامة خلينا من سلام دريك ووجدو رؤسكم وقد قاطعته ياك لباس ، اجابني القصر الكبير طلع لها الجوك ،من حيث لا تظنوه قلت له اش واقع ا شكاين عندك . قال لي مرر قرار واعر اليوم بخصوص القصر الكبير ، قلت ديال اش ، قال قرر تحويل مكتب ديال مسؤول كبير كي يباشر مهامه من القصر الكبير لانه مريض و الجو عندكم يناسبه و قد نصحه الاطباء بذلك . قلت ايو ايبدلو المسؤول لاش ايحولو المكتب . قالي شكون هذا لي يقدر ايبدلو . قلت شكون هذا ؟؟ قال واحد ما توقعو ولا تصورو و القرار سيبقى سري حتى ينتهوا من الترتيبات ، عندك خويا اسامة تقول هذا شي لشي واحد . قلت له انا مافهمت والو اصلا هذا شي غامض . قال نهار الاحد تشوف بعينك طراكسات و الكماين و لكيران و السيارات الفاخرة تدخل عندكم باش ايوجدو ، الطرق و الصباغة و تبليط الاحياء و الانارة و المستشفى لان المسؤول عندو حصة اسبوعية ديال العلاج فلمستشفى غادي ايجهزو لو جناح خاص ، و غادي ايكون توظيفات باش المعطلين ما ايديرو الوقفات و غاد يتوزعو الدكاكين ويتمنع احتلال الملك العام بزاف ديال الامور غادي تكاد عندكم لدرجة جبدو تقرير على جميع الاحتجاجات ديال القصر لكبير و قالوا هاد شي كامل خاص الاستجابة لو باش ننهوا شي حاجة سميتها الاحتجاج في القصر الكبير ، بزاف ديال الملفات عندكم ما ضبطتها مزيان المهم شي مشكيل عندكم في الواد الحار و الماء غادي ايحلوه ، شي ساحات غادي ايكادوهم و كاين ملي شي جامع كبير عندكم غادي ايديرو فيه شي اشغال خايفين مع رمضان ليبغي المسؤول ايصلي التراويح .
قلت هاد شي كبير بزاف شكون هذا لي جاي ، قال اقطع دبا كيتصلو بيا من لخدمة ، غادي نسيفط لك شكون فمساج دابا .
و للأمانة بعث لي بالمساج الآتي :
يوم الأحد سيحل عليكم شهر أبريل و كل كذبة ابريل و أنتم بألف خير .منقول بتصرف
عن تدوينة ل : أسامة بن مسعود