“شكون” هو محمد الشملالي؟؟؟

العرائش نيوز:

“شكون” هو محمد الشملالي؟؟؟

بقلم: شفيق العمراني

مواطن مغربي شد الباك و شمَّر على كتافو و دخل للجامعة المغربية، قطَّع صباطو و سبرديلتو و كلا لكتوبة دياولو، لومليط كل نهار و الحمَّام جوج مرات في الشهر، و التغوفيلة ديما حيت ما كاينش فلوس الحسانة، ديما محَنسر و حازق و مفقوس، و لكن كان مركز على الحلم ديالو الِّي هو يكمل قرايتو، كان كيحلم ياخد الإجازة و موراها دبلوم الدراسات العليا المعمقة و موراها الدكتوراه، يلقا خدمة زوينة، يصيفط والديه للحج، يضربها بشي تجويجة فاعلة تاركة، و يبدا حياتو.
السي محمد الشملالي فاش خدا الإجازة ديالو لقا كْْْاع البيبان مسدودين قدامو، ما قدرش يتسجل في السلك الثالث و نتوما عارفين علاش، أولا لأنه ولد الشعب، ثانيا لأن ما عندوش البيسطون.
دوز عرام ديال الكونكورات، قلب على الخدمة في القطاع الخاص و العمومي،النتيجة: والو.
ناضل سنين مع الموجزين المعطلين لعل و عسى يتنوما مع المخزن واخا غير بالسُلَّم صفر، النتيجة: والو.
السي محمد الشملالي كبر في العمر و شبابو ضاع في التقلاب على الخدمة، النتيجة: والو.
واش السي محمد الشملالي فقد الأمل؟؟؟
واش السي محمد الشملالي نتاحر؟؟؟
واش السي محمد الشملالي ستسلم؟؟؟
واش السي محمد الشملالي بدا يعطيها للحشيش و الطاسا باش ينسى أنه شومور؟؟؟
واش السي محمد الشملالي خرج كيكْْْريسي في عباد الله؟؟؟
واش السي محمد الشملالي فكر يحركْْْ فشي باطيرا هروبا من أجمل بلد في العالم؟؟؟
السي محمد الشملالي شمر عوتاني على كتافو، والديه باعو أعز ما عندهم و صحابو سلفوه شي بركة و ناض وجد وريقاتو القانونيين كاملين و خدا الرخصة من عند الدولة المسخوطة و فتح روض للأطفال، تجوج و بدا حياتو كأي مغربي كيحفر على الخبز بسنانو و عرق كتافو.
واحد الصباح جا عندو القايد و المخازنية، ما خلاوش دراري يدخلو للروض، قالو ليه ممنوع تعاود تفتح هاد الروض، سولهوم علاش؟ قالو ليه يلا عندك شي سؤال سير المحكمة دعينا .
السي محمد الشملالي دابا داير إضراب عن الطعام و البارح فقد الوعي و هزوه للصبيطار، و مراتو حتى هي طاحت كوما و خلات ولدها عندو 3 شهور بلا حليب
دخلت عليكم بوجه الله واش كاين شي دولة في العالم كيوقع فيها هاد الشي؟؟؟
‫#‏كلناـالشملالي‬