العرائش نيوز:
إلى السيد وزير الصحة المحترم
الله يرحم الوالدين واش يرضيك في العرائش وبالضبط المستشفى الإقليمي للا مريم المريضات ناعسين ف صالة وحدة مع المرضى صنف الرجال ؟
يعني المرأة إذا كانت ناعسة وتكشفت العورة ديالها او الراجل كان ناعس وطاحت ليه المانطة أو ليزار تخايل معنا شنو ممكن نشوفو !
هادشي في الصالة وإذا نضنا للطواليط راه ميكس وعاد من الفوق مخنوقة .
وممكن ترجع لما جاء في تقرير لجنة المرافق لجماعة العرائش والتي صرح رئيسها بحضور الجميع سلطة ومنتخبين وصحافة .
تخايل مرا مزيرة مقدراش تشد البولة او كرشها خفيفة بحكم عامل السن وبغات تقضي حاجتها البيولوجية بحال ناس كاملين ولسوء حظها كتلقى طواليط فيها راجل الداخل حتى هو كبير في السن وخصو وقت باش يدير داكشي وربما تكون كرشو قاصحة بمعنى خصو وقت كبير ..
الموصيبة ان الرجال كبار حتى كيفتح باب طواليط عاد كيبدا يعدل ف حوايجو وعينك متشوف إلا النور …
يعني فضائح وكوارث …
هذا ناس لي مشاو سبيطار اوقات الزيارة وشافو هادشي وشافو رجال يقضون حاجتهم المائية واقفين ملي تزيروا لقاو طواليط عامرة …
منظر بشع وبئيس ولا يشرف بتاتا المملكة المغربية ولا المجهودات المبذولة من طرف الوزارة .
عندي سؤال واحد الله يرحم الوالدين ديالك ف هذ نهار
الفلوس اللي كيدخلها سبيطار واللي أكيد ارتفعت مؤخرا واش ميمكنش يصلحوا بيها ويزيدو بيها طواليط تكون تحفظ كرامة المريض .
وديك القضية ديال صالة جامعين فيها نسا ورجال واش يرضيكم هادشي ؟ ماشي عيب وعار أن سيدة تكون ناعسة وتضربها الفيقة تلقى راسها عورتها كيتفرجو فيها زملاءها في الصالة ؟
هناك أجنحة فارغة بالمستشفى ونقية حسن من الصالة البئيسة ولكن العيب ماشي ف المريض ماشي ف الصالة راه العقم كاين ف العقلية المتحجرة ….؟
ديرو زيارة شخصية للعرائش مبقيناش باغيين نسمعو اللجنة جات اللجنة مشات …
وملتمس أخير لكم سيدي وزير الصحة الله يرحم اللي رباك وقراك سول لينا في سبيطار بالضبط وكنهضر على سبيطار ديال العرائش كيفاش المريض خصو يخلص قبل ما يدخل يدير العملية ؟ وفي حالة إذا وقع طارئ او مكنش شي مادة او المواطن لقا باللي ذاك الشي اللي قالوا ليه عند بنتك ماشي صحيح ، يعني نقولو كان التشخيص غالط … انا كنقول يكون المواطن خلص فلوسو ومدارش العملية …
فهذا الحالة الفلوس مشات للمالية المواطن ضاع ف الفلوس والعملية باااااااااااح .
الحق في الصحة حق دستوري .
نحن مع التطبيق السليم للقانون ونظام سيݣما ولكن بدون شطط .
التوقيع
محمد بلمهيدي
رئيس الرابطة المغربية للدفاع عن حقوق المستهلك .